صاحبة القطط: سلوى أبو النجا

16 Mar صاحبة القطط: سلوى أبو النجا

في يوم المرأة المصرية لازم اننا نوجه الضوء على سيدات مصر اللي ليهم أثر بارز في الدنيا من حواليهم. من الشخصيات دي “صاحبة القطط”.

 يمكن تكون مش معروفة بنفس شهرة أخوها الأصغر الفنان خالد أبو النجا لكن سلوى أبو النجا كانت معروفة بين مجموعات إنقاذ الحيوانات وكانت مثال أعلى.
قضت سلوى أبو النجا حياتها وهي بتهتم بالحيوانات وكانت بتنقذهم وتتبناهم بشكل مستمر، حتى الحالات الصعبة أو اللي محتاجة رعاية خاصة.

ناس كتير بتراعي حيوانات أليفة، اشمعنى دي اللي نتكلم عنها؟
ماتت سلوى أبو النجا في حريق في شقتها في الزمالك سنة ٢٠١٥ عن عمر يناهز ال ٦٢. بالرغم من إنها كان ممكن تنقذ نفسها وتخرج من الحريق إلا إنها دخلت فيه تاني بإرادتها في محاولة إنقاذ ٣٠ قط كانت بترعاهم في الوقت ده. 
غير دعمها الدايم في مجتمع الإنقاذ، اللي ميز سلوى أبو النجا وخلدها في ذاكرة ناس كتير من محبي الحيوانات كان موقف وفاتها.

في النهاية أنقذت ١٨  قط بس قبل ما تموت مخنوقة، وبالرغم إن مات ١٢ منهم بعد كده، وده خلى ناس كتير تفكر إن روحها هي كانت أولى إلا إنها في الموقف ده اختارت القطط قبل نفسها، وأصبحت “صاحبة القطط” في ذاكرتنا كلنا وعلامة في مجتمع الإنقاذ ومحبي الحيوانات كمثال للرحمة.